İstifadə qaydaları

1. Əsas anlayışlar və razılıq

1.1. TaksiOl taksi sektorunda iş, avtomobil, taksi parkı, avtoservis, avtomobil detalı və avtomobil alqı-satqısı elanlarını bir araya gətirən rəqəmsal platformadır.

1.2. “Administrasiya” TaksiOl platformasını idarə edən, texniki dəstəyi və moderasiyanı həyata keçirən tərəfdir. “İstifadəçi” platformaya baxan və ya hesabla daxil olan şəxsdir. “Elan sahibi” elanı və ya aktiv sürücü iş profilini paylaşan istifadəçidir.

1.3. Saytdan istifadə, hesab yaratmaq, elan göndərmək və ya rəy yazmaq bu qaydaların qəbul edilməsi deməkdir. Qaydalarla razı olmayan şəxs platformadan istifadəni dayandırmalıdır.

1.4. TaksiOl işəgötürən, satıcı, alıcı, icarəyə verən, icarəçi, avtoservis, ödəniş vasitəçisi və ya tərəflər arasında bağlanan müqavilənin tərəfi deyil. Razılaşmalar istifadəçilər arasında birbaşa bağlanır.

1.5. Bu qaydalar İstifadəçi razılaşması, Məxfilik siyasəti və platformada göstərilən kateqoriya tələbləri ilə birlikdə tətbiq olunur.

2. Yaş, hesab və təhlükəsizlik

2.1. Hesab yaradan şəxs ən azı 18 yaşında olmalı və paylaşdığı məlumatların hüquqi nəticələrini başa düşməlidir.

2.2. Ad, telefon nömrəsi, rol və profil məlumatları düzgün və aktual olmalıdır. Saxta ad, başqasına məxsus nömrə və ya yanlış biznes məlumatı ilə hesab yaratmaq qadağandır.

2.3. Bir telefon nömrəsi ilə bir əsas istifadəçi hesabı yaradılır. Şəxs və ya təşkilat məhdudiyyəti keçmək üçün əlavə və saxta hesablar aça bilməz.

2.4. İstifadəçi hesab növünü real fəaliyyətinə uyğun seçməlidir. Təşkilat və ya mağaza adından hesab açan şəxs həmin profili idarə etmək səlahiyyətinə malik olmalıdır.

2.5. Parol, SMS təsdiq kodu və hesabın bərpa məlumatları məxfi saxlanmalıdır. Hesaba icazəsiz giriş şübhəsi yarandıqda istifadəçi parolu dəyişməli və TaksiOl dəstəyinə məlumat verməlidir.

2.6. Hesabın satılması, icarəyə verilməsi, başqa şəxsə ötürülməsi və ya bloklanmış şəxsin başqa hesab vasitəsilə platformaya qayıtması qadağandır.

2.7. Administrasiya profilin, rolun, elan sahibinin və ya elanda göstərilən məlumatların yoxlanması üçün uyğun təsdiq məlumatı istəyə bilər. Həssas sənədlər açıq elan mətnində paylaşılmamalıdır.

3. Hesab növləri və elan səlahiyyətləri

3.1. Sürücü hesabının iş profili qeydiyyat və profil tamamlama məlumatlarından yaranır. Sürücü iş statusunu “İş axtarıram”, “İşləyirəm, təkliflərə açığam” və ya “İş axtarmıram” kimi idarə edir; ayrıca sürücü elanı yaratmır.

3.2. Taksi parkı sürücü və ya avtomobil sahibi üçün park təklifi, taksi avtomobili icarəsi, avtomobil detalı və avtomobil satışı elanı yerləşdirə bilər.

3.3. Avtomobil sahibi taksi avtomobili icarəsi, avtomobil detalı və avtomobil satışı elanı yerləşdirə bilər. Bu hesab taksi parkı adından sürücü axtarışı elanı yerləşdirə bilməz.

3.4. Avtoservis hesabı yalnız öz xidmətlərinə aid avtoservis elanları, həmçinin qanuni şəkildə təklif etdiyi avtomobil detalı və avtomobil satışı elanları yerləşdirə bilər.

3.5. Avtodetal mağazası avtomobil detalı və qanuni şəkildə təklif etdiyi avtomobil satışı elanları yerləşdirə bilər. Başqa servis və ya taksi parkı adından elan paylaşa bilməz.

3.6. Avtomobil detalı və avtomobil satışı elanları uyğun məlumatı və satış hüququ olan bütün qeydiyyatlı hesab növləri üçün açıqdır.

3.7. Admin hesabı elanları və profilləri yoxlamaq, redaktə etmək, təsdiqləmək, rədd etmək, dayandırmaq və silmək üçün istifadə olunur.

3.8. Administrasiya yanlış seçilmiş hesab rolunu və ya elan kateqoriyasını düzəldə, əlavə yoxlama tələb edə və uyğun olmayan əməliyyatı dayandıra bilər.

4. Elan üçün əsas tələblər

4.1. Elan yalnız aid olduğu kateqoriyada yerləşdirilməlidir və bir real təklifə aid olmalıdır.

4.2. Başlıq, təsvir, qiymət, qiymət dövrü, yer, vəziyyət və digər məlumatlar dəqiq, aydın, real və aktual olmalıdır. “Günlük”, “aylıq”, “faiz” kimi şərtlər olduqda dövr və hesablanma qaydası açıq göstərilməlidir.

4.3. Elan sahibi təklif etdiyi avtomobil, detal və ya xidmət üzərində satış, icarə, istifadə və paylaşma hüququna malik olmalıdır.

4.4. Eyni təklif üçün təkrar elan, süni şəkildə fərqli yazılmış dublikat və ya axtarış nəticələrini manipulyasiya edən elan yerləşdirmək olmaz.

4.5. Başlıq və təsvir normal yazı qaydasında, sadə və başa düşülən dildə olmalıdır. Həddindən artıq böyük hərflər, əlaqəsiz açar sözlər, yanlış marka və model adları qəbul edilmir.

4.6. Telefon nömrəsi, WhatsApp, sosial şəbəkə hesabı, xarici keçid və digər əlaqə məlumatları yalnız bunun üçün ayrılmış qorunan sahələrə yazılmalıdır. Sürücü profilinin açıq başlıq və təsvirində əlaqə məlumatı paylaşmaq qəti qadağandır.

4.7. Elan göndərildikdən sonra “Gözləmədə” statusuna düşür və admin təsdiqindən sonra açıq saytda görünür. Admin tərəfindən yaradılan və ya xüsusi qayda ilə təsdiqlənən elanlar istisna ola bilər.

5. Kateqoriyalara aid xüsusi qaydalar

• Taksi parkı elanında kim üçün təklif verildiyi, iş və ya əməkdaşlıq şərtləri, icarə və ya maaş faizi, depozit və qrafik aydın göstərilməlidir.
• Avtomobil icarəsi elanında günlük icarə haqqı, depozit, avtomobilin vəziyyəti, taksi icazəsi, Kasko sığorta məlumatı və ödənişdən sonra mülkiyyətin keçib-keçmədiyi düzgün göstərilməlidir.
• Sürücü iş profilində yaş, sürücülük və taksi təcrübəsi, vəsiqənin verilmə tarixi, taksi icazəsi və iş statusu real olmalıdır. Şəxsiyyət sənədinin tam surəti açıq hissədə paylaşılmamalıdır.
• Avtoservis elanında görülən xidmət, xidmətin harada göstərildiyi, başlanğıc qiyməti və varsa zəmanət şərti aydın yazılmalıdır.
• Avtodetal elanında detalın adı, uyğun marka və modellər, yeni və ya işlənmiş olması, qiyməti, çatdırılma və zəmanət məlumatı düzgün göstərilməlidir. Saxta, oğurlanmış və ya istifadəsi təhlükəli detal təklif etmək qadağandır.
• Avtomobil satışı elanında marka, model, buraxılış ili, yürüş, texniki vəziyyət və satış qiyməti real olmalıdır. Elan sahibi avtomobili satmaq hüququna malik olmalıdır.

6. Elanın redaktəsi və aktivlik müddəti

6.1. Elan sahibi elanını kabinetdən redaktə edə, dayandıra və ya silə bilər. Vacib məlumat dəyişdirildikdə elan yenidən moderasiyaya göndərilə bilər.

6.2. Bir elan redaktə edilərək tamam başqa avtomobilə, detala, xidmətə, işə və ya şəxsə aid elana çevrilə bilməz. Belə təklif üçün yeni elan yaradılmalıdır.

6.3. Satılmış, icarəyə verilmiş, işçi tapılmış və ya başqa səbəbdən artıq aktual olmayan elan vaxtında dayandırılmalı və ya silinməlidir.

6.4. Elanın göstərilən bitmə tarixi başa çatdıqda elan gizlədilə və “Müddəti bitib” statusuna keçirilə bilər. Yenidən dərc zamanı məlumatlar aktual olmalı və elan təkrar moderasiyadan keçə bilər.

6.5. Rədd edilmiş, silinmiş və ya bloklanmış elanı cüzi dəyişikliklə yenidən göndərərək moderasiyadan yayınmaq olmaz.

6.6. Elan və hesab silindikdə bəzi texniki, təhlükəsizlik və audit qeydləri Məxfilik siyasətinə və qanuni saxlama tələblərinə uyğun müddət ərzində saxlanıla bilər.

7. Şəkil qaydaları

7.1. Şəkillər yalnız JPG/JPEG, PNG və WEBP formatında yüklənə bilər. Hər şəkil maksimum 5 MB, bir elanda isə maksimum 8 şəkil olmalıdır.

7.2. Minimum 800 × 600 piksel ölçü tələb olunur. Ən yaxşı nəticə üçün 1200 × 900 piksel və üfüqi 4:3 nisbəti tövsiyə edilir. Şaquli şəkil qəbul olunsa da, önizləmədə kəsilə bilər.

7.3. Şəkil elanda təklif edilən avtomobili, detalı, servisi və ya profili real və aydın göstərməlidir. Başqa elana aid, təkrar, bulanıq və həddindən artıq qaranlıq şəkillər qəbul edilməyə bilər.

7.4. Skrinşot, kollaj, ağır filtr və retuş, su nişanı, QR-kod, telefon nömrəsi, qiymət, xarici sayt ünvanı və aidiyyətsiz reklam olan şəkillər qadağandır. Biznes loqosu profil şəkli və bunun üçün ayrılmış sahədə istifadə oluna bilər.

7.5. İstifadəçi yalnız özünə məxsus olan və ya paylaşmağa icazəsi olan şəkilləri yükləməlidir. Başqa saytdan və ya başqa istifadəçidən icazəsiz götürülmüş şəkillər silinir.

7.6. Şəxsi həyatı, müəllif hüquqlarını və ya qanunvericiliyi pozan görüntülər paylaşılmamalıdır. Şəkildə görünən şəxslərin razılığına görə elan sahibi cavabdehdir.

7.7. TaksiOl şəkilləri düzgün və sürətli göstərmək üçün ölçüləndirə, kəsə, sıxa və WEBP formatına çevirə bilər. Moderasiyadan keçməsi elan sahibini şəkilə görə məsuliyyətdən azad etmir.

8. Moderasiya və təsdiqləmə

8.1. Elan və profillər dərc edilməzdən əvvəl və dərc edildikdən sonra yoxlanıla bilər.

8.2. Administrasiya qaydalara uyğun olmayan elanı təsdiqləməmək, düzəliş üçün geri qaytarmaq, uyğun kateqoriyaya keçirmək, redaktə etmək, dayandırmaq və ya silmək hüququna malikdir.

8.3. Yoxlama üçün əlavə məlumat və ya məlumatın həqiqiliyini göstərən sənəd tələb edilə bilər. Tələb olunan məlumat təqdim edilənədək elan və ya profil yayımlanmaya bilər.

8.4. “Təsdiqlənib” nişanı yalnız müəyyən məlumatların yoxlanıldığını göstərir; işin, xidmətin, ödənişin, avtomobilin və ya qarşı tərəfin tam zəmanəti deyil.

8.5. Qaydaların təkrar və ya ciddi şəkildə pozulması elan yerləşdirmə imkanının məhdudlaşdırılmasına, profilin təsdiqinin ləğvinə və hesabın müvəqqəti və ya daimi bloklanmasına səbəb ola bilər.

8.6. Moderasiyadan keçmiş elan belə, elan sahibini məlumatların düzgünlüyünə və qanuniliyinə görə məsuliyyətdən azad etmir.

9. Qadağan olunan məzmun və davranış

• saxta, natamam, yanlış və ya aldadıcı məlumat və sənədlər;
• təkrar elan, spam, axtarış nəticələrini və baxış sayını süni artıran hərəkətlər;
• mövcud olmayan iş, avtomobil, detal və xidmət təklifləri;
• oğurlanmış, saxta, qanunla satışı qadağan edilmiş və ya istifadəsi təhlükəli məhsullar;
• başqa şəxs və şirkətin adından icazəsiz elan və ya profil yaratmaq;
• təhqir, böhtan, hədə, ayrı-seçkilik, nifrət, zorakılıq, pornoqrafiya, terror və qanunsuz fəaliyyətə çağırış;
• üçüncü şəxsin şəxsi məlumatını, telefonunu, ünvanını, şəklini və sənədini icazəsiz paylaşmaq;
• zərərli proqram, virus, fişinq, dələduzluq və hesab məlumatlarını ələ keçirməyə yönəlmiş məzmun;
• TaksiOl-a və seçilmiş kateqoriyaya aid olmayan reklam və keçidlər;
• moderasiya, əlaqə məxfiliyi, rol və təhlükəsizlik məhdudiyyətlərini keçməyə cəhd.

10. Reytinq və şərhlər

10.1. Sürücünü yalnız taksi parkı və avtomobil sahibi hesabları, taksi parkını isə sürücü və avtomobil sahibi hesabları qiymətləndirə bilər. Rəy yazmaq üçün hesaba daxil olmaq lazımdır.

10.2. Reytinq və şərh real əməkdaşlığa, görüşə və ya birbaşa təcrübəyə əsaslanmalıdır. Saxta rəy, qarşılıqlı reytinq artırılması və rəqibi gözdən salmaq qadağandır.

10.3. Şərhdə əlaqə məlumatı, şəxsi və həssas məlumat, təhqir, böhtan, hədə, reklam və mövzuya aid olmayan mətn paylaşmaq olmaz.

10.4. İstifadəçi öz rəyini yeniləyə bilər. Administrasiya qaydanı pozan rəyi gizlədə və ya silə, reytinqi yenidən hesablaya və təkrar pozuntuda rəy yazmaq imkanını məhdudlaşdıra bilər.

10.5. Reytinq istifadəçi fikirlərinin ümumi göstəricisidir və TaksiOl-un həmin şəxs və ya biznes barədə zəmanəti sayılmır.

11. Sürücü əlaqə məlumatlarının qorunması

11.1. Sürücünün telefon nömrəsi açıq səhifənin mətnində, HTML-də və açıq məlumat sorğularında göstərilmir.

11.2. Sürücü ilə əlaqə məlumatına yalnız TaksiOl-un icazə verdiyi və hesaba daxil olmuş taksi parkı, avtomobil sahibi və admin rolları funksional qaydalara uyğun baxa bilər.

11.3. Əldə olunan telefon nömrəsi yalnız uyğun iş və əməkdaşlıq təklifi üçün istifadə edilməlidir. Nömrəni yaymaq, satmaq, məlumat bazası yaratmaq, spam və icazəsiz reklam göndərmək qadağandır.

11.4. İcazəsiz giriş cəhdləri qeydə alına, hesab məhdudlaşdırıla və zəruri hallarda aidiyyəti üzrə təqdim edilə bilər.

12. İstifadəçi məzmunu və müəllif hüquqları

12.1. İstifadəçi yüklədiyi mətn, şəkil, loqo və digər material üzərində sahib olduğu hüquqları qoruyur və həmin materialı paylaşmaq üçün lazımi icazəyə malik olduğunu təsdiq edir.

12.2. İstifadəçi materialı platformaya yerləşdirməklə TaksiOl-a onu elanın və profilin göstərilməsi, ölçüləndirilməsi, texniki emalı, axtarış nəticələrində və TaksiOl-un öz tanıtım materiallarında təqdim edilməsi üçün məhdud, qeyri-müstəsna və ödənişsiz istifadə icazəsi verir.

12.3. Bu icazə xidmətin göstərilməsi və qanuni arxiv ehtiyacı üçün lazım olan müddətdə qüvvədə olur. Üçüncü şəxsin hüququnu pozan materiala görə onu yerləşdirən istifadəçi məsuliyyət daşıyır.

12.4. TaksiOl adı, loqosu, saytın dizaynı, proqram təminatı və administrasiya tərəfindən hazırlanmış məzmun icazəsiz köçürülə, satıla, dəyişdirilə və başqa platformada TaksiOl adından istifadə edilə bilməz.

13. SMS, e-poçt və bildirişlər

13.1. TaksiOl qeydiyyat, telefon təsdiqi, parolun bərpası, hesab təhlükəsizliyi, elan moderasiyası, müraciət və vacib xidmət məlumatları üçün istifadəçinin telefonuna SMS və ya e-poçt göndərə bilər.

13.2. Təhlükəsizlik və xidmət üçün vacib bildirişlər hesabın işləməsi üçün zəruri ola bilər. Reklam və kampaniya mesajları yalnız uyğun razılıq olduqda göndərilməlidir və istifadəçi belə mesajlardan imtina edə bilər.

13.3. İstifadəçi düzgün və işlək telefon nömrəsi və e-poçt ünvanı təqdim etməlidir. Mobil operator, e-poçt xidməti və ya digər texniki səbəbdən mesajın gecikməsinə TaksiOl tam zəmanət verə bilməz.

14. Texniki istifadə qaydaları

14.1. Yazılı icazə olmadan bot, skript, avtomatik elan yerləşdirmə vasitəsi, məlumat toplayıcı və ya saytın qorumasını keçən proqramdan istifadə etmək qadağandır.

14.2. Saytın işini ləngitmək, həddindən artıq sorğu göndərmək, təhlükəsizlik boşluğu axtarmaq və ya ondan istifadə etmək, başqa hesab və məlumatlara giriş əldə etmək olmaz.

14.3. TaksiOl-un proqramını, məlumat bazasını, dizaynını və məzmununu icazəsiz köçürmək, dəyişdirmək, yaymaq və ya mənbə kodunu əldə etməyə çalışmaq qadağandır.

14.4. Platformadakı xarici xəritə, telefon, e-poçt və digər keçidlər üçüncü tərəf xidmətlərinə apara bilər. Həmin xidmətlərin işi və qaydaları onların təminatçılarına aiddir.

15. Təhlükəsizlik və məsuliyyət

15.1. İşə qəbul, avtomobil icarəsi, alqı-satqı, servis və detal alışından əvvəl qarşı tərəfin şəxsiyyəti, səlahiyyəti, sənədləri, avtomobili, məhsulu və təklif etdiyi şərtlər istifadəçi tərəfindən yoxlanmalıdır.

15.2. Qarşı tərəfi yoxlamadan pul göndərmək, bank kartı məlumatı, SMS kodu, parol, şəxsiyyət sənədinin tam surəti və digər həssas məlumatları paylaşmaq olmaz.

15.3. TaksiOl elanın mütləq doğru olmasına, tərəflərin razılaşmasına, işə qəbulun baş tutmasına, avtomobilin və detalın vəziyyətinə və ya xidmətin keyfiyyətinə zəmanət vermir.

15.4. Qanunvericiliyin icazə verdiyi həddə TaksiOl istifadəçilər arasındakı razılaşmadan, ödənişdən, itkidən, gəlir itkisindən, üçüncü şəxsin hərəkətindən və ya xarici xidmətin nasazlığından yaranan zərərə görə məsuliyyət daşımır.

15.5. Texniki xidmət, təhlükəsizlik yeniləməsi, internet və ya üçüncü tərəf nasazlığı zamanı platformanın bəzi funksiyaları müvəqqəti işləməyə bilər. TaksiOl xidmətin fasiləsiz və xətasız olmasına tam zəmanət vermir.

16. Hesabın məhdudlaşdırılması və silinməsi

16.1. İstifadəçi kabinetdə təqdim olunan imkanla hesabının silinməsini tələb edə bilər. Hesab silindikdə aktiv elanlar və açıq profil gizlədilir.

16.2. Qayda pozuntusu, təhlükəsizlik riski, saxta məlumat, qanunsuz fəaliyyət və ya səlahiyyətsiz giriş halında administrasiya hesabı xəbərdarlıqla və ya ciddi hallarda dərhal məhdudlaşdıra bilər.

16.3. Bloklanmış istifadəçi məhdudiyyəti keçmək üçün yeni hesab yarada və başqa şəxsin hesabından istifadə edə bilməz.

16.4. Hesabın silinməsi qanuni öhdəlik, təhlükəsizlik araşdırması, şikayət və audit üçün saxlanmalı olan məlumatların dərhal silinməsi demək deyil. Saxlanma Məxfilik siyasətinə uyğun aparılır.

17. Şikayət, mübahisə və tətbiq olunan hüquq

17.1. Qaydalara zidd elan, profil, rəy və ya şübhəli davranış barədə elan səhifəsindəki “Şikayət et” funksiyası və ya TaksiOl-un dəstək kanalları vasitəsilə müraciət etmək olar.

17.2. Şikayət mümkün qədər dəqiq məlumat və sübutla təqdim edilməlidir. Administrasiya müraciəti araşdıra, tərəflərdən əlavə məlumat istəyə və uyğun tədbir görə bilər.

17.3. İstifadəçilər arasındakı şəxsi müqavilə və ödəniş mübahisələri əvvəlcə tərəflər arasında həll olunur. TaksiOl zəruri olduqda yalnız platformadakı qayda pozuntusunu araşdırır.

17.4. Bu qaydalara və platformadan istifadəyə Azərbaycan Respublikasının qanunvericiliyi tətbiq olunur. Mübahisənin danışıq yolu ilə həlli mümkün olmadıqda məsələ səlahiyyətli məhkəmədə həll edilir.

17.5. Qaydaların hər hansı hissəsinin etibarsız sayılması digər hissələrin qüvvəsini aradan qaldırmır.

17.6. Müraciətlər üçün salam@taksiol.az ünvanına yaza və ya 010 460 50 50 nömrəsi ilə əlaqə saxlaya bilərsiniz.

18. Qaydaların yenilənməsi

18.1. Administrasiya platformanın inkişafı, təhlükəsizlik tələbləri və qanunvericilikdəki dəyişikliklərə uyğun olaraq bu qaydaları yeniləyə bilər.

18.2. Yeni mətn saytda dərc edildiyi tarixdən qüvvəyə minir. Vacib dəyişikliklər barədə istifadəçiyə sayt, SMS və ya e-poçt vasitəsilə məlumat verilə bilər.

18.3. Dəyişiklik qüvvəyə mindikdən sonra platformadan istifadənin davam etdirilməsi yenilənmiş qaydaların qəbul edilməsi sayılır.